IRUNGO EAJ-PNVEK ETA EH BILDUK FORUEN ABOLIZIOAREN ETA ALKATEEN MUGIMENDUAREN URTEURRENAK ALDARRIKATU DITUZTE

Bi alderdi politikoek adierazpen bateratua plazaratu dute 2026ko efemeride nagusien harira, Euskal Herriaren eskubide historikoak, udalerrien eginkizun demokratikoa eta autogobernuaren eguneratzea defendatuz. Bergaran uztailaren 19an egingo den ekitaldi instituzionalarekin bat egin dute.urteak bi mugarri historiko ekarri ditu gogora: 1876ko Foruen abolizioaren 150. urteurrena eta 1976ko Bergarako Alkateen Mugimenduaren 50. urteurrena. Testuinguru horretan, Irungo EAJ-PNVek eta EH Bilduk adierazpen bateratua sinatu dute, Euskal Herriak azken mendeetan bizi izan duen eskubide historikoen galera eta burujabetza instituzionalaren murrizketa azpimarratuz.

Alderdi sinatzaileek gogorarazi dute XVIII. mendearen amaieratik aurrera Lapurdi, Nafarroa Beherea eta Zuberoako eskubide historikoak Frantziako Iraultzaren ondorioz desegin zirela, eta XIX. mendean Nafarroa Garaia, Araba, Bizkaia eta Gipuzkoa ere antzeko prozesuen menpe geratu zirela. “Erabaki haiek herri borondatearen gainetik ezarri ziren”, adierazi dute.

Halaber, 1976ko uztailaren 21ean Bergaran bildutako alkate eta zinegotzien ekimena ekarri dute gogora, frankismoaren amaieran euskal nortasuna, udal tradizio demokratikoa eta autogobernuaren beharra aldarrikatu zituzten mugimendu historikoa. “Orduko espirituak gaurkotasun osoa du”, nabarmendu dute.

Adierazpenean, bi alderdiak bat datoz Euskal Herriak autogobernu eta burujabetza handiagoa behar dituela gaur egungo erronkei erantzuteko. Udalerrien eginkizun historikoa eta demokratikoa ere azpimarratu dute, eta konpromisoa hartu dute etorkizuneko eraikuntza instituzionalean udal erakundeen rola indartzeko.

Azkenik, Irungo EAJ-PNVek eta EH Bilduk iragarri dute 2026ko uztailaren 19an Bergaran egingo den ekitaldi politiko-instituzionalarekin bat egiten dutela, Alkateen Mugimendua gogoratzeko eta Euskal Herriaren eskubide historikoen aldeko konpromisoa berritzeko.

ARRIETAREN ARGAZKIA